إبرة التنحيف هي حبة الباندول الجديدة !

ليش أغلب حلول تنزيل الوزن الطبية "ما تحل" مشكلة تنزيل الوزن؟

ليش اللي ينزلوا وزنهم باستخدام الإبر يستعيدوا في المتوسط ثلثين الوزن اللي خسروه خلال سنة وحدة بس من إيقافها؟ (المصدر)

وليش أنا أعتقد إن أغلب اللي يتم إعطاؤهم إبرة تنحيف لتنزيل وزنهم كأنك تعطيهم حبة بنادول لحد كبير جداً؟

أشبّهها بالمسكّن أكثر من العلاج لسبب بسيط جداً، وهذا المثال يوضحه:

لو أنت شربك للماء قليل جداً (سلوك)

وهذا مسبب لك الصداع مثلاً (أعراض)

فلما تجي تاخذ حبة باندول (مسكّن)

يروح العرض واللي هو الصداع،

ولكنه يعود بسرعة خلال ساعات أو ثاني يوم بالكثير. ليش؟

لأن السلوك نفسه مكمّل معك ولا زال موجود!

أما لو اشتغلت على طريقة شربك للماء، كمية كافية وأوقات مناسبة؟

مبروك، لست بحاجة لأي حبوب بعد اليوم!

إذن عشان نجد حل حقيقي لمشكلة الوزن لابد أننا ننظر في السلوك الأساسي المسبب للمشكلة اللي نعاني منها وهي الوزن

بدلاً من البحث عن حبة سحرية أو إبرة لتنزيله.

وهنا نجي لأهم فكرة لابد إنك تقتنع فيها عشان تتخطى مشكلة الوزن في حياتك وهذي المرة للأبد:

أي إنسان عنده مشكلة وزن زايد أو جسمه واصل لمرحلة مو عاجبه شكله أو وزنه أو صحته أو لياقته

لو قربنا من حياته اليومية.. بنكتشف قطعاً إنه عنده مشاكل في أحد هذين الأمرين:

١- حركة

عاداته الحركية سواء (رياضية أو غير رياضية) فيها مشكلة، مايمشي كفاية، ما عنده عضلات كفاية فبالتالي معدل حرقه متدهور.

إيوا يا صديقي، تخيل انه حتى معدل حرقك اللي تعتقد إنه هوا السبب

هو مجرد أعراض لعدم حركتك الكافية، وصدقني تقدر تتحكم فيه بشكل كبير جداً.

ترا حتى مقاومة الإنسولين ( اللي عادة تكون السبب لوصف الإبرة ) هي أحد أهم وأشهر الأعراض لزيادة الوزن،

وبمجرد ما تنزل وزنك

وتقلل نسبة الدهون مقاومة الإنسولين تقل (وتتحسن حساسيته في جسمك وهذا شي إيجابي جداً).

٢- عادات الأكل

وهنا تجد كوارث في نسب البروتين، كميات الطعام والسعرات فيه، المغذيات الصغرى وغيرها.

وللأسف من ملاحظتي بعد ما دربت ٢٥٨ شخص حتى الآن

وساعدت المئات في الاستشارات وفي السوشال ميديا

أغلب الناس وللأسف عندها مشكلة في الاثنين مع بعض وليس واحد منهم فقط.

فبالله عليك أي إبرة هذي اللي لما تاخذها راح تغير سلوكياتك وعاداتك؟

ملاحظة مهمة : قبل لا تحسب إني شخص متعصب للأمور الطبيعية وضد الطب ـواحب نظام الطيبات واشوف منظمة الصحة العالمية مؤامرة !

أنا جداً أحترم اختراع الإبر العبقري واللي جا عشان يستبدل التكميم بشكل أو بآخر، وفي ناس يحتاجوه، وفي ناس من الذكاء يدمجوا بينه وبين تعديل العادات ويكون عامل مساعد لهم بشكل كبير. لكن أنا ضد إنك تكون عافس كل هذا وسايبه زي ما هو، ورايح تاخذ الإبرة عشان هي تحل لك مشاكلك كلها.

يا صديقي، الإبرة تنجح في تنزيل وزنك بشكل أساسي بسبب شي واحد فقط وهو (إجبارك على تناول كميات قليلة جداً بالقوة الغاصبة)، وهذا كله يختفي بمجرد إيقافك لها وتعود لكل شي بشكل طبيعي، ولذلك الوزن يعود مجدداً بكل سهولة.

بالإضافة لشي خطييير جداً كثير ناس تقع فيه بدون ما تنتبه.

وهو بكل بساطة: تناول كميات قليلة جداً وتنزيل الوزن بالغصب يؤدي لخسارة كمية معتبرة من العضلات، خصوصاً بدون تمارين مقاومة وبروتين كافي. (المصدر: )

وهذا بشكل مباشر يساهم في إضعاف معدلات الحرق لمستويات متدنية جداً

إدخال الجسم في وضعية تخزين دهون قوية.

وهذا ليش شي كارثي؟

لأنك لو تتذكر السببين اللي اتفقنا عليهم فوق واللي كانو السبب في وضع وزنك الحالي ؟

اللي هما مشاكل الحركة ومشاكل التغذية …

فانت ستعود لها هذي المرة ولكن بمعدل حرق أضعف بمراحل وبالتالي أثرها يكون عليك أسوأ.

اذن زي ما من البديهي لو تبغى تعالج صداع الجفاف.. لابد تتعلّم شرب الموية بالطريقة الصحيحة.

اذن لو تبغى الحل لمشكلة الوزن، ضعف الحرق، القوة واللياقة والصحة على مدى العمر؟

لابد تتعلّم العادات والسلوكيات الحركية + الغذائية الصحيحة

وتتخلص من الجري وراء الحبة السحرية والعلاجات السطحية.

شكراً لقراءتك هذا المقال كاملاً وشكراً لتحملك الحقيقة رغم أنها قد تبدو مرة و صعبة

لكن، أنا هنا مرشد رياضي و هدفي الأول والأخير مشاركة طرق أكثر رشداً لأسلوب حياة صحي ومستدام.

و لو تبغى تقرأ مقالات أكثر، وا رسلك هيا على ايميلك أول بأول

انضم لنشرتي البريدية عشان يوصلك كل مقال جديد مباشرة

أشوفك في المقال الأرشادي القادم.